بهرب بعيد على طول السطور
وبخاف لما أنط من سطر لسطر،
أقع في قعر الصفحة....
ماعرفش اطلع تاني.
وانهج من اللف وسط الحروف
وأتعب من رص الكلمات
كلمة جنب كلمة في جملة ملهاش معنى
مايفهمهاش غيري أنا!!
---
كل يوم بيمر على صوت دقات عقارب الساعة
صوتها زي صوت رجل السجين
على سلالم المعتقل
بطيئة، كئيبة مافيهاش حياة
سلالم بتنزل لتحت بس
للضلمة، للوحدة اللي مافيهاش حياة
مابتطلعش لفوق
وألحق نفسي على آخر سلالم اليوم
قبل ما أغمض عينيا
آخد نفس عميق
واعرف إني لسة عايش
فانتحر في حضن النوم!!!
---
ودماغي فيها زحمة
أفكار وخطط بتلف في متاهة مخي
وأحلام بتحاول توصل لآخر المشوار
بس فيه زحمة مشاكل
فيه خناقة سيطرة بين الماضي والحاضر
فيه حادثة سير في طريق المستقبل
مات فيها احلام كتير كانت بتحاول توصل
والاحلام الباقية لسة بتحاول
ماشية خطوة خطوة
يمكن توصل لآخر المشوار
قبل ما تتعب وتعجز
قبل الزهق ما ينسيها هي مين
ورايحة فين
وتلاقي نفسها ماشية مشوار لحد الحيط!!!
---
واضرب بفرشي على لوحة بيضة
أشوهها
أرسم عليها بنت لابسة فستان أحمر
لون الغرام... مش لون الدم
وبعيون سود
لون الليل... مش لون الهم
وخدها لونه وردي
من الخجل ... مش من الكبت
وشفايفها ندية وبتلمع
ومحدش يعرف إن دموعها هي اللي بلتها
والنسيم مطير خصلات شعرها
ومموت جسمها من البرد
وفي إيديها وردة مفتحة
ريحتها حلوة.... أوي
بس مش هأرسم الشوك
اللي جارح كفها
ومش هأرسم رجلها
عشان اللوحة مش هتكفي
أو عشان هي مش محتاجة رجلين
ما هي مش هتروح في حتة
مش هتمشي برة حدود اللوحة!!!
---
وفي المراية وش غريب
أصفر من التعب وابيض من كتر الألم
وفوق الحاجب عرق ناطر
بينبض في شجب واعتراض
بيحاول محاولة مزعجة لاثبات وجود حياة
ونفس راكد
طالع زاحف
وراجع خايف
من بين شفايف بتترعش
بتحاول تتهجى اللي انكتب
في عيون فيها حاجة ناقصة
أو حاجات كتير زيادة!
حاجات شيبت شعر منكوش
زي الإيدين ممدودة في كل مكان
إيدين بتنادي بيأس
وإيدين بتشاور بالوداع
إيدين بتحارب بسيف من خشب
وإيدين بتحلف كدب ميت يمين
إيدين بتشهر عهد الإيمان
وإيدين بتلوح براية كفر
والمراية مش بتخبي حاجة
بكل جرأة بتبحلق فيا
بإنعكاسات حقيقية
لوش مجهول الهوية
---
واوصل لآخر السطور
واقف عند نقطة في آخر السطر.....
آآآآآخر سطر
وأسأل نفسي....
أنا كدة قلت كفاية؟!!
ولا لسة ماقولتش حاجة؟!!
وأبص لورا...
أراجع السطور...
أرفع راسي...
عشان أشوف اول سطر،
يختل توازني....
وأقع من على آخر سطر
في قعر الصفحة!!!
| < السابق | التالي > |
|---|
