كنت قاعد في أوضة ضلمة بسمع اصوات من بعيد
ماكنتش شايف حاجة بس بسمع دة أكيد
في يوم سمعت صوت هادي وفي نفس الوقت كان شديد
كان باين قوي في صوته إن فكره كان شريد
قالي انا عندي امل في بكرة وانه فيه فجر جديد
فجر بكرة انت تنوره بكرامة وارادة من حديد
بموقف ثابت وفكر في الحق عنيد
بعقل واعي متزن ورأي دايما يكون سديد
وفضلت افكر وفي الكلام عمال اعيد
وكل ما اقرب افهم الاقى لهفتي للخروج تزيد
انا بكرة هأبقى راجل وهكون للناس مفيد
هيكونلي دم حامي بيجري في الشريان والوريد
ومش هتراجع قدام حكم ظالم ولا ألف وعيد
وهأسترد أرضي وأعمرها واكون سعيد
وفجأة سمعت صوت جامد نازل سب وتهديد
واصوات ضعيفة تانية شغالة شجب وتنديد
وسمعت صرخة صوتها مش جاي من بعيد
واتزلزلت الأرض تحتي وحسيت مرة واحدة اني بقيت مريض
مش قادر اتنفس و الالم عمال يزيد
ليه محدش بيساعدني؟! هو انا ليه بقيت وحيد؟!!
خلاص مش هأحقق حلمي وحلم ابويا صاحب الصوت الهادي الشريد
لأني مش حألحق أعيش لبكرة واشوف الفجر الجديد
انا اتقتلت في بطن امي الشهيدة قبل حتى ما أكون وليد
انا اتقتلت في بطن امي انا الطفل الشهيد.....
| < السابق | التالي > |
|---|
